e Shtunë 19 Maj 2012

TEDxPrishtina 2012: SEndërtim

Ndërtimi i hovshëm, që ka përfshirë qytetet e fshatrat e Kosovës, po ngre ndërtesa, po zgjat rrugë, e po shton numrin e kafiqave nga dita në dite. Ndryshimi fizik i faqes urbane të vendit nuk është i vetmi modifikim i gjendjes së shoqërisë kosovare. Ashtu si edhe investitorët e industrisë së ndërtimit, të huaj e vendas, aktorë të shumtë kanë përveshur mëngët duke ndërhyrë në strukturën e shoqërisë kosovare në virtualisht çdo fushë e aspekt të saj. Modelet e përdorura në qeverisje, reforma ekonomike, arsim, arkitekturë,  art dhe teknologji janë si të huazuara ashtu edhe të krijuara posaçërisht për kontekstin vendas. Herë të goditura e herë të papërshtatshme, ndërtimet shoqërore të Kosovës po e ndryshojnë panoramën e vendit.

Ashtu si shtëpitë e pambaruara, që mund të shihen buzë çdo magjistraleje nëpër Kosovë, ndërtimet shoqërore shpesh herë nisen pa planifikim të mirëfilltë nga ndërtues me aftësi gjysmake. Qytetarët e Kosovës e shprehin këtë dualitet që rrethon morinë e ideve të zbatuara në vendin e tyre, ndërsa pijnë kafe pas kafeje.

Në edicionin e saj të dytë, konferenca TEDxPrishtina do të ofrojë një arenë të sigurtë, ku mendime dhe ide rreth ndërtimeve shoqërore të dekadës së fundit dhe asaj të ardhshme, do të transferohen nga kafiqi në një ambient nxitës, mes një audience të përzgjedhur nga komuniteti entuziast i ideve që vlejnë të shpërndahen.

Në TEDxPrishtina 2012, konstruksione të forta e të përfunduara dhe plane të menduara mirë do të prezantohen nga artistë, publicistë, akademikë, e emra të rinj e të mirënjohur të disiplinave të ndryshme.

Ashtu si edhe me edicionin e parë, TEDxPrishtina synon të shtyjë audiencën dhe komunitetin e gjerë të shqyrtojnë, diskutojnë, dhe marrin me vete nga konferenca ide të cilat i prekin çështjet e ditës në mënyre proaktive dhe alternative.

Të ndërtosh me vizion gjysmak nuk mjafton. Në TEDxPrishtina 2012, ndërtimi shndërrohet në SEndërtim.